वीरगन्ज । पर्सा निर्वाचन क्षेत्र नम्बर–१ मा राष्ट्रिय स्वतन्त्र पार्टीले चुनावी गतिविधिलाई तीव्रता दिँदै घरदैलो अभियानलाई प्रभावकारी बनाएको छ। बदलिँदो राजनीतिक सन्देशसहित रास्वपा अहिले टोल–टोलमा पुगेर मतदातासँग प्रत्यक्ष संवादमा जुटिरहेको छ।
यसैक्रममा रास्वपाका प्रतिनिधिसभा उम्मेदवार हरि पन्तले पिपरा, लालपर्सा, भेडिहाइँ र सोलखपुर क्षेत्रका विभिन्न बस्तीमा पुगेर स्थानीय नागरिकसँग भेटघाट तथा छलफल गरेका छन्।
अभियानका क्रममा स्थानीयले पन्तलाई टीका, माला र खादा अर्पण गर्दै स्वागत गरेका थिए। मतदाताले रास्वपालाई मुलुकको राजनीतिक परिवर्तनको नयाँ आशा भएको प्रतिक्रिया दिएको उनले बताए ।
स्थानीयवासीले यसपटक पर्सा–१ बाट नयाँ सोच र वैकल्पिक राजनीतिलाई संसदसम्म पुर्याउने दृढता व्यक्त गर्दै रास्वपाको पक्षमा उभिने संकेत दिएको उनको दावी छ ।
भेटघाटका क्रममा नागरिकहरूले बेरोजगारीको चर्को समस्या, शिक्षा र स्वास्थ्य सेवाको कमजोर पहुँच, खानेपानी अभाव तथा विकास निर्माणमा देखिएको अव्यवस्थाप्रति असन्तुष्टि पोखेका थिए।
जनताका सवाल र गुनासो सुन्दै उम्मेदवार पन्तले परम्परागत राजनीतिक शैलीबाट बाहिर निस्केर जनताको प्रत्यक्ष निगरानीमा चल्ने जवाफदेही र पारदर्शी राजनीति स्थापित गर्ने प्रतिबद्धता व्यक्त गरे। उनले समस्याको समाधान भाषणमा नभई काममा देखिने गरी अघि बढाइने बताए।
घरदैलो अभियानमा रास्वपाका स्थानीय नेता–कार्यकर्ता, युवा, महिला तथा सर्वसाधारणको सक्रिय सहभागिता देखिएको थियो।
तपाईको प्रतिक्रिया