प्रहरी प्रमुखमा अर्याल नियुक्त

4/10/2017 गते 00 00 मा प्रकाशित 1132 पटक पढिएको

काठमाडौं २८ चैत। प्रचण्ड सरकारले लामो विवादपछि डीआईजी प्रकाश अर्याललाई आईजीपीमा नियुक्त गरेको छ । सोमबार साँझ बसेको मन्त्रिपरिषद बैठकको प्रकाश अर्याललाई प्रहरी महानिरीक्षक नियुक्त गर्ने निर्णय गरेको हो । साँझ दोस्रो पटक बसेको मन्त्रिपरिषद् बैठकले अर्याललाई प्रहरी प्रमुखमा बढुवा गर्ने निर्णय गरेको हो । अर्यालले बढुवाको पत्र प्रधानमन्त्री तथा मन्त्रिपरिषद् कार्यालय पुगेर बुझेकाछन् । अर्यालको स्थायी घर दाङ घोराही उपमहानगरपालिका १५ भरतपुर हो ।

आईजीपीका दाबेदारहरुको कार्यसम्पादनको नम्बरका आधारमा उनलाई आईजीपी बनाइएको दावी गरिएको छ । नम्बर पेश गर्न गृह सचिव, प्रधानमन्त्री कार्यालयका सचिव, कानुन सचिव र निमित्त प्रहरी प्रमुख रहेको समिति बनाइएको थियो ।

उनीहरुले पेश गरेको कार्यसम्पादनको नम्बरका आधारमा अर्याललाई प्रहरी प्रमुख बनाइएको एक मन्त्रीले बताए ।

माघ २० मा डिआईजी जयबहादुर चन्दलाई महानिरिक्षक नियुक्त गर्न मन्त्रिपरिषदले गरेको निर्णय सर्वोच्च अदालतले उल्ट्याएको थियो । चन्दलाई महानिरिक्षक बनाए लगत्तै मन्त्रिपरिषद्को निर्णय विधीसम्मत नरहेको भन्दै डिआईजी नवराज सिलवालले निर्णय खारेज गरीपाउँ भन्दै सर्वोच्च अदालत रिट दिएका थिए । सर्वोच्च अदालतले तत्कालै महानिरिक्षक नियुक्तीको सरकारी निर्णयलाई अल्पकालिन अन्तरिम आदेश दिएर रोकेको थियो ।

सर्वोच्चले डीआईजी जयबहादुर चन्दलाई प्रहरी प्रमुख बनाउने निर्णय खारेज गर्दै चार वर्षको कार्यसम्पादनमा पहिलो हुनेलाई आईजीपी बनाउन निर्देशन दिएको थियो ।