वीरगञ्ज, २७ चैत । गम्भिर प्रकृतिको अपराध अनुसन्धानमा पर्साको प्रहरी पछिल्लो समयमा असफल देखिएको छ । एकवर्ष भित्र पर्सामा भएका हत्याका घटनाहरुलाई अध्ययन गर्दा र त्यसमा पनि तीनवटा गम्भिर प्रकृतिको हत्याको मामिला प्रहरीले टुङ्गोमा पु¥याउन सकेको छैन । ती तीनवटै घटनामा संलग्न अपराधीहरुलाई प्रहरीले कानूनको दायरमा ल्याउन नसकेपछि पीडित परिवारलाई थप त्रासमा बाँच्न बाध्य बनाएको छ । आर्थिक वर्ष २०६५/०६६ भन्दा अगाडि शान्ति सुरक्षा कायम गर्न पर्सा प्रहरी असफल रही आएको थियो । अहिले त्यसकै पुनरावृति भएको अनूभूती सर्वसाधारणलाई हुन थालेको छ । सात वर्ष अगाडी ब्यवसायिक प्रतिवद्धतामा अडिक भएर अगाडी बढेको पर्सा प्रहरी पुनः पुरानै दिशातर्फ उन्मुख भएको घटनाक्रमले देखाउन थालेको छ ।

वितेको साउनमा पर्साको चारकोसे झाडीमा पटेर्वा सुगौली गाउ“पालिकाको सोनवर्षाका एकजना मुस्लिम समुदायका यूवकको हत्या भयो । त्यस्तै असोज २० वीरगञ्जको चीनीमिल आवास क्षेत्र स्थित प्रहरीनायब उपरीक्षकको क्वाटर पछाडी एकजना ९ वर्षिय वालक राजन पटेलको शव फेला प¥यो । चैत १५ गते बहुदरामाई गाउँपालिका १ बिश्रामपुरका ३८ वर्षिय अनोद साह कलवारको शरीरका विभिन्न अंगहरु काटिएको अवस्थामा शव फेला प¥यो । यी तीनैवटा घटनाका पीडित न्याय पाउनका लागि जिल्ला प्रहरी कार्यालय पर्सामा निकै धाए तर उनीहरुको केही सुनुवाई भएन । आजको दिनसम्म प्रहरीको एउटै जवाफ छ, अनुसन्धान गरिरहेका छौं । तर एउटा अनुसन्धानकर्ताले देखाउने तदारुकता, “कमन्सेन्स” तथा शंकास्पद व्यक्तिहरुको खोजी तथा उनीहरुको बारेमा जाच पडताल लगायतका क्रियाकलाप भएको देखिदैन । महिनौं सम्म कल डिटेल्सको विश्लेषण भइरहेको बहानामा प्रहरी पन्छिदै आएको छ । सोनवर्षाका मियाँको हत्या गाँजा तस्करीसँग जोडिएको मामिला हो ।

यसरी सो क्षेत्रमा हुने यो तेश्रो हत्या हो । मकवानपुरबाट गाँजा चरेस ल्याउन नेपाली सेनाको सुरक्षामा रहेको चारकोशे झाँडीको बाटो तस्करले प्रयोग गर्दै आएका छन् । तस्कर समूहसँग इन्सास राइफल पनि रहेको कुरा पटक–पटक प्रकाशमा आइसकेको छ । गाँजाको स्कर्टिङ्ग गर्न तस्करहरुले माओवादीसँग केहि वर्ष अगाडी दुई थान सो राईफल किनेका थिए । साईकलको फ्रेम काटेर बनाइएको बाह« बोरको कटुवा बन्दुक समातेर बहादुरीको ढिढोरा पिट्ने प्रहरी तस्करसँग भएको स्वचालित आधुनिक हतियार बरामद गर्न सकेको छैन । त्यस्तै राजन पटेलको हत्याको कारण अहिलेसम्म रहस्यकै गर्भमा छ । उनको काका दोषीलाई कारवाही गराउन जिल्ला प्रहरी कार्यालय धाएर थाकिसकेका छन् । राजनका काका वृजकिशोर पटेलले भने ः मैले कान समातिसकेको छु, न्यायको लागि जिल्ला प्रहरी कार्यालय जादिन । त्यस्तै विश्रामपुरको घटना अहिलेसम्म मोवाईल कल डिटेल्सको विश्लेषण मै अल्झिएको छ ।

अपराध हेर्ने प्रहरी निरीक्षक उमाशंकर यादव कल डिटेल्सको पोका लिएर पिडितलाई अनुसन्धान गरिरहेको रेडिमेड जवाफ फर्काउने गरेका छन् । यसरी हुने अधिकांश हत्याहरुको कारकतत्व लागूऔषधको तस्करी, भण्डार तथा ओसार पोसार रहेको प्रष्ट छ । पर्सामा गाँजा खेती नभए पनि मकवानपुर, चितवन र धादिङ्गमा उत्पादन भएको गाँजा, चरेस भारतसम्म पु¥याउन पर्साको बाटो प्रयोग भइरहेको छ । पर्सालाई लागूऔषधको ट्राजिन्ट प्वाईन्टबाट मुक्त गराउन जिल्ला प्रहरी कार्यालय पर्सा र त्यसमा समन्वयको भूमिका निर्वाह गर्ने मध्यक्षेत्रीय प्रहरी कार्यालय हेटौंडा अर्जुन दृष्टि बनाएको देखिदैन ।