मोर्चा निर्वाचनमा सहभागी नहुने

4/12/2017 गते 00 00 मा प्रकाशित 1098 पटक पढिएको

काठमाडौं, ३० चैत । मधेशकेन्द्रीत दलको संयुक्त लोकतान्त्रिक मधेशी मोर्चा सरकारले ल्याएको दोश्रो संशोधन प्रस्तावको स्वामित्व नलिने निष्कर्षमा पुगेको छ । प्रदेशको सिमाङ्कन लगायत आफ्ना पूरा माग नसमेटिएको भन्दै मोर्चाले सरकारले ल्याएको संविधान संशोधनको नयाँ प्रस्तावको स्वामित्व नलिने निर्णय गरेको हो । मोर्चाले संविधान संशोधन विधेयकको नयाँ प्रस्ताव पुरानो प्रस्तावभन्दा पनि पछाडि फर्केको आरोप लगाउँदै स्थानीय चुनावमा सहभागी नहुने निर्णय गरेको छ । मोर्चाले सरकार र कार्यदलले तयार गरेको सहमती भन्दा फरक बिषय समेटर प्रस्ताव ल्याइएको जनाएको छ ।

तराई मधेस लोकतान्त्रिक पार्टीको कार्यालय बिजुलीबजारमा बसेको बैठकले हिजो मंगलबार सरकारले संसदमा पेस गरेको विधेयकले मोर्चाको मुख्य माग सीमांकनलाई सम्बोधन नगरेको, पुरानो विधेयकमा उल्लेखित नागरिकता, राष्ट्रिय सभा, भाषाको विषय परिमार्जन नगरिएको भन्दै यो विधेयकको स्वामित्व नलिने निर्णय गरेको हो ।

मोर्चाले स्थानीय तहको मात्रै होइन अव हुने कुनै पनि तहको चुनाव बहिस्कार गर्ने निर्णय गरेको हो । सरकार गठन गर्दा भएको सम्झौता अनुरुप कांग्रेस माओवादी गठबन्धनले भने मधेसी मोर्चालाई रिझाउन हर सम्भव प्रयास गर्दै आएको छ । निर्वाचनका सबै कार्यक्रम बहिस्कार गर्ने र आन्दोलनका कार्यक्रम घोषणा गर्ने मोर्चाले जनाएको छ ।

तर, मोर्चाका कार्यकर्ता भने निर्वाचन तयारीमा जुटिसकेका छन् । मोर्चाले निर्वाचनमा भाग नलिए अन्य पार्टीहरुमा प्रवेश गरेर निर्वाचित हुने लहर तराई मधेसमा बढेको छ ।