वीरगन्ज - संघीय समाजवादी फोरम नेपालबाट वीरगन्ज महानगरपालिकाको मेयरमा निर्वाचित भएका विजय कुमार सरावगीले आफू चढ्ने गाडीमा मेयर वीरगन्जको नेम प्लेट लगाएका छन् । सामाजिक सञ्जालदेखि लिएर वीरगन्जको प्रवुद्ध वर्गमा उक्त नेम प्लेटलाई लिएर अझैपनि अनेक टिका टिप्पणी हुने गरेको छ ।

भारतको विहार र उत्तरप्रदेश राज्यमा आफू चढ्ने गाडीमा यस्तो ‘नेम प्लेट’ झुन्डयाउने प्रवृत्ति बढी छ । यता, नेपालमा वीरगन्जका मेयरले पहिलो पटक विहारी शैली अप्नाएका हुन् । उनी मात्र नभएर फोरमबाटै आसन्न प्रतिनिधी सभा चुनावमा पर्सा क्षेत्र नम्बर १ का उम्मेदवार प्रदीप यादवले आफ्नो चुनावी अभियानमा विहारका सांसद अजय निसाद र राजदका नेता साविर अंसारीलाई सहभागि गराई भाषण गर्न लगाए । 

विदेशी सांसद र नेता नेपालको चुनावमा मतदातालाई प्रभाव पार्न प्रयोग गरिएपछि यस क्षेत्रका युवा तथा भद्रभलादमी वर्गले व्यापक असन्तुष्टि व्यक्त गरेका छन् । नेपाली जनताले आफ्नो भविष्य निर्माण गर्ने सांसद चयन गर्दा विदेशीको हस्तक्षेप भएको भन्दै विरोध गरेका हुन् । गत साता रिपोर्टस क्लबको आयोजनामा वीरगन्जको माइस्थान स्थित गहवा माई मन्दिर अगाडि भएको चुनावी अन्तरक्रियामा फोरमका कार्यकर्ताले आफ्ना उम्मेदवार प्रदीप यादव बाहेक अन्य पार्टीका उम्मेदवारलाई बोल्नै दिएनन् ।
 
कांग्रेस र एमालेका उम्मेदवारले बोल्न लाग्दा सिटबाट उठेर हुलहुज्जतमा उत्रेका थिए । चुनावी अन्तरक्रियामा सहभागि हुन आएका अधिकांश जनता फोरम कार्यकर्ताको उच्छश्रृंखल गतिविधीबाट निराश बन्दै फर्किएका थिए । नजित्दै यस्तो गुन्डागर्दी प्रदर्शन गरेका फोरमका कार्यकर्ताले उसको नेता जितेपछि भविष्यमा के–के गर्ने होलान् भन्दै फर्किएका थिए । 
आर्थिक नगरी वीरगन्ज नेपालकै मूख्य व्यापारिक केन्द्र हो ।

यहाँको जनता मुलुकको हरेक राजनीतिक आन्दोलनमा सक्रिय सहभागिता जनाएका छन् । तर, यहाको नेताको केन्द्रमा पहुच नहुदा वीरगन्जको विकास हुन सकेन् । २००७ सालमा पर्सामै पहिलो पटक नेपाली कांग्रेसको मुक्ति सेनाले वीरगन्जमा राणाहरुको ब्यारेक कब्जामा लिएका थिए । त्यसपछि भएको ०४६ सालको आन्दोलन होस् वा ०६२/०६३ जनआन्दोलन वीरगन्जवासीको व्यापाक सहभागिता रहेको थियो ।

०६४ को पहिलो मधेस आन्दोलनपनि वीरगन्जमा चर्किएपछि मात्र सफल भएको थियो । पछिल्लो पटक भएको तेस्रो मधेस आन्दोलन मधेसका अन्य सहरहरुमा फितलो बनेपछि वीरगन्ज एक्लैले आन्दोलनको बिँडो थामेको थियो । सम्पूर्ण जनताले आन्दोलन र नाकाधर्नामा साथ दिए तर फोरमका नेताले तेल तस्करी र सुक्खा बन्दरगाहबाट गाडी पठाएर अकुत सम्पक्ति कमाए । त्यही नेता अहिले मधेसको ‘मसिहा’ भएको दाबी गर्दै जनतासंग भोट मागिरहेका छन् ।

ऐतिहासिक व्यापारिक नगरीका मतदाता अहिले जटिल मोडमा उभिएका छन् । ५ वर्षका लागि सांसद प्रतिनिधी चयन गर्ने बेला गलत व्यक्ति जितेर गएमा यो क्षेत्र थप १० वर्ष पछाडि पर्ने पक्का छ ।  कांग्रेसका उम्मेदवार अनिल कुमार रुंगटा एक सफल उद्योगी र व्यापारी पनि हुन् ।

वीरगन्जको समस्या समाधान गर्न चौतर्फी योजना बनाएका रुंगटाको राज्यको माथिल्लो निकायमा राम्रो सम्बन्ध छ । सांसदमा निर्वाचित भएपछि रुंगटाले सजिलै योजना ल्याउन सक्छन् । युवालाई रोजगारी र वीरगन्जको वैभव फर्काउने मूख्य लक्ष्य लिएर चुनावी अभियानमा होमिएका रुंगटाले संविधान संशोधन गरी मधेसको असन्तुष्टि समेत पुरा गर्ने बताउँदै आएका छन् ।