वीरगन्ज - ‘पहिलो मधेस आन्दोलनमा कांग्रेस छोडेर फोरममा लागे । त्यसपछि निरन्तर मधेसका लागि संघर्ष गरिरहे । पछिल्लो ६ महिनाको नाकाबन्दीमा दिनहुँ वीरगन्ज रक्सौल नाकामा धर्नामा बसे । तर, जब पार्टीबाट टिकट दिने बेला आयो तब श्रीमतीलाई दिइयो ।

आफूलाई मसिहा भन्नेहरु तेल तस्करी गरे । पैसा लिएर ड्राइपोर्टबाट ट्रक काठमाडौँ पुर्‍याए । सहिद परिवारलाई चुनाव लड्नका लागि टिकट नदिनेहरु अहिले सहिदकै फोटो टोल टोलमा घुमाएर भोट मागिरहेका छन् । फोरमसंग कुनै एजेन्डा नै छैन् ।’ यि सबै कुराबाट आजित भएर संघीय समाजवादी फोरम नेपालका संस्थापक सदस्य सलाम शेख सामेबार साँझ फोरम परित्याग गरि कांग्रेसमा प्रवेश गरेका छन् । |

पर्साको क्षेत्र नम्बर १ का प्रतिनिधी सभा उम्मेदवार अनिल कुमार रुंगटाले आयोजना गरेको पार्टी प्रवेश कार्यक्रममा शेख सलामले भावुक हुँदै भने, ‘मधेसको सच्चा पार्टी त कांग्रेस नै रहेछ ।’ सलामले यति भन्ने बित्तिकै चारैतर्फ जय नेपालको नारा गुन्जिएको थियो । उनीसंगै राष्ट्रिय जनता पार्टी (राजपा) का सचिव विनोद कुशवाहा, मुस्लिम संघको केन्द्रीय सदस्य एैनुल देवान, किर्तन मण्डलीका अध्यक्ष हृदेणी साह कानुको नेतृत्वमा करिब ३ सय स्थानीय मुर्ली चौकमा आयोजित रात्रिसभामा प्रवेश गरेका थिए ।

 प्रतिनिधी सभाका उम्मेदवार अनिलकुमार रुंगटाले नवप्रवेशीलाई अविर र माला लगाएर स्वागत गरेका थिए । मधेसको बांकी रहेको माग संविधान संशोधन मार्फत कांग्रेसले नै पुरा गर्ने र विकासको बाटोमा मुलुकलाई अगाडि बढाउने रुंगटाले बताए । यसैगरि राधेमाईका युवा भूषण क्षेत्रीको नेतृत्व ५५ जना युवाहरुलाई पनि रुंगटाले पार्टीमा स्वागत गरेका थिए । 

निर्वाचन प्रचार प्रसारको अन्तिम दिन फोरम र राजपाका सयौँ युवा कांग्रेसमा प्रवेश गर्दा कांग्रेस क्षेत्र नम्बर एकको चुनावी अभियानमा सकारात्मक सन्देश प्रवाह भएको छ । राजनीतिक विश्लेषकका अनुसार मतदानको सँघारमा यसरी फोरमका कार्यकर्ता कांग्रेसमा प्रवेश गर्दा कांग्रेसजन उत्साही बनेका छन् ।

उम्मेदवारी मनोनयन दर्तापछि पर्सा क्षेत्र नम्बर एकमा पर्ने १९ वटा वडामा झन्डै ७ हजार नयाँ कार्यकर्ता प्रवेश गरिसकेका छन् । आर्थिक तथा व्यापारिक नगरी वीरगन्जको समृद्धि, विकास र रोजगारका लागि उम्मेदवारी दिएका अनिलकुमार रुंगटाको पक्षमा पछिल्लो समय जनलहर बढ्दो छ । फोरम र राजपाका असन्तुष्ट रहेका नेता तथा कार्यकर्ताहरुले पनि रुंगटालाई भोट हाल्ने बताइएको छ ।

यसपाली एमालेका उम्मेदवारको पक्षमा माहौल नबनेपछि एमालेको अधिकांश मतदाताले समेत रुंगटालाई नै मत हाल्ने एमालेका एक नेता बताउँछन् । वीरगन्जको उज्जवल भविष्यलाई लिएर चिन्तित रह्ने प्रवुद्ध वर्गले समेत समाजमा असल छवि बनाएका रुंगटालाई मतदान गर्ने मनस्थिती बनाएका छन् ।