कलैया, २४ माघ । सडकमा खसालिएको धूलोका कारणले कलैया वीरगंज सडक खण्ड अन्तर्गतको सिसहनीयामा बुधबार ट्रयाक्टरको ठक्करबाट एक जनाको मृत्यु समेत भएको छ ।

कलैयाबाट घर जाँदै गरेको अवस्थामा पछाडीबाट ट्रयाक्टरले ठक्कर दिँदा सोही स्थान बस्ने जीवत ठाकुरकी १६ बर्षीया छोरी नीभा ठाकुरको ट्रयाक्टरको ठक्करबाट मृत्यु भएको बारे जिल्ला प्रहरी कार्यालय बाराले जानकारी दिएको छ ।

ठाकुरलाई ना १ त १४१० नम्बरको ट्रयाक्टरले ठक्कर दिएको जिल्ला प्रहरी कार्यालय बाराका प्रहरी नायब उपरिक्षक भुवनेश्वर प्रसाद साहले बताए । ठक्करबाट ठाकुरको घटनास्थलमा नै मृत्यु भएको प्रहरीको भनाई रहेको छ । ठक्कर दिने गाडी तथा चालक राजकुमार सहनी प्रहरीको नियन्त्रणमा रहेको छ ।

ठक्करबाट ठाकुरको मृत्यु भएपछि त्यसको विरोधमा मृतकका आफन्त र स्थानीयबासीले केहिबेर चक्का जाम समेत गरेका थिए । सडक निर्माणको क्रममा खसालिएको माटोको धुलोले बाटो काट्ने क्रममा नदेखिएपछि निभालाई ट्याक्टरले ठक्कर दिएको र उनको ज्यान गएको स्थानीयले बताएका छन् ।

हुलाकी राजमार्ग निर्माणका लागि ठेकेदारले खसालेको माटोका कारण कलैया वीरगन्ज सडकखण्डमा सवारी दुर्घटनाको जोखिम बढेको छ । हुलाकी राजमार्गसँग जोडिने सहायक मार्ग कलैया वीरगन्ज सडक खण्डमा खसालेको माटोको धुलो उडेर सडक नै ढाक्ने गरेका कारण अहिले सर्वसधारणलाई आवत जावत गर्न सास्ती मात्रै होईन सडक दुर्घटनाका कारण सर्वसाधारणको ज्यान समेत गएको छ ।

१५ मिटर चौडाई भएको सडक निर्माणको कन्स्ट्रक्सनले जिम्मेवारी पाएपछि केहि दिन अगाडीबाट काम गर्न शुरु गरेको छ । काम शुरु गर्दै पप्पु कन्स्ट्रक्सनले कलैया वीरगन्ज सडक खण्डमा खसालेको माटोको धूलो उडेर बाटो नै नदेखिदा दुर्घटना समेत भएको छ ।

सडकमा खसालिएको माटोको धूलोले सर्वसधारणको स्वास्थ्यमा समेत असर परेको सर्वसाधारणको गूनासो छ । पर्साको प्रतिमा चोकदेखि बाराको बरियारपुरसम्मको हुलाकी सडक निर्माणको जिम्मा पाएको पप्पु कन्स्ट्रक्सनले सडकमा माटो खसाल्न शुरु गरेको र माटोको धूलोले सडकमा आवतजावत गर्ने सवारी साधन र यात्रुहरुलाई समस्या हुने गरेको हो ।

१५ मिटर चौडाईको हुलाकी सडकलाई केहीदिन अघि मात्र कलैया उपमहानगरपालिकाको सर्वदलीय बैठकबाट कलैया वीरगन्ज खण्डमा ३० मिटर चौडाई बनाउन माग गर्ने निर्णय गरेको थियो । अहिले हुलाकी सडक निर्माणका लागि धमाधम माटो खसाल्ने काम भईरहेको छ ।

माटो सडकमा खासालेपछि उडेको धुलोले सडक नदेखिने र सवारी दुर्घटना हुने गरेको सवारी चालकहरुले बताएका छन् ।  धुलाम्य सडकमा सवारीले ठक्कर दिएर सर्वसाधारणले ज्यान समेत गुमाएपनि स्थानीय प्रशासन भने यसप्रति गम्भीर नभएको स्थानीयको आरोप छ ।

यस विषयमा बाराका प्रमुख जिल्ला अधिकारी विजय नारायण मानन्धरसँग सम्पर्क गर्दा निर्माणका लागि खसालिएको धूलोलाई केही गर्न नसक्ने जवाफ दिएका छन् । सडकमा खसालिएको माटोको धूलो उड्न नदिन पानी पटाउन सक्ने भएपनि प्रमुख जिल्ला अधिकारी मानन्धरको अभिव्यक्तिले सर्वसाधरण जो कोहीलाई पनि विझाउन सक्छ ।

उनले भने, “सडक निर्माण गर्न खसालेको माटोको धूलो उड्छ भने के गर्ने त ? सडक निर्माण नै रोक्ने ?” माटो खसालेकै कारण धुलाम्य सडकमा सवारी चलाउदा सर्वसाधारणले ज्यान गुमाउनु परेको भएपनि सम्बन्धित ठेकेदार र स्थानीय प्रशासनले दिएको गैरजिम्मेवारी अभिव्यक्तिले भने सर्वसाधारण दुखी बनेका छन् ।