बीरगंज २३ चैत ।

जिल्ला समन्वय समिति पर्सा र अनौपचारिक क्षेत्र सेवा केन्द्र (इन्सेक) को आयोजनामा स्थानीय समुदायलाई सचेत पार्दै जिम्मेवार निकायलाई जवाफदेह बनाउने   परियोजनाको जिल्लास्तरीय परामर्श बैठक शुक्रवार  गते जिल्ला समन्वय समिति पर्सामा सम्पन्न भएको छ ।

कार्यक्रममा औनपचारिक क्षेत्र सेवा केन्द्र ( इन्सेक )का पर्साका प्रतिनिधि के.सी.लामिछाने परियोजनाको बारेमा जानकारी गराएका थिए ।  

खाद्य, शिक्षा र स्वास्थ्यका क्षेत्रमा सरकारले ग्रामीण तहसम्म उपलब्ध गराएको सेवा सुविधा स्थानीय नागरिकले उपभोग गर्न पाए नपाएको विषयमा  निगरानी समुह बनाएर काम भइरहेको उनले बताए ।

स्वास्थ्यको क्षेत्रमा भौतिक संरचनाहरु बनेको तर ती हस्तान्तरण नभएर ग्रामीण बासिन्दाले प्रभावकारी स्वास्थ्य सेवा नपाएकोमा जिल्ला स्तरीय  तथा गाउँमा गठन भएको मानव अधिकार निगरानी समुहको पहलमा स्वास्थ्य चौकी समुदायलाई हस्तान्तरण भएको उनले बताए ।

समुहको पहलकमदीमा पटेर्वा सुगौली गाउँपालिकाको वडा नं २ मा निर्माण भएको स्वास्थ्यचौकी  गएको मंसिर ६ गते समुदायलाई हस्तान्तरण भएको हो । उनले त्यस्ता संरचना हस्तान्तरणको वातावरण बनाउन गाएामा गठन भएका समूह र  जिल्ला स्तरीय समुहले पर्साका प्रमुख जिल्ला अधिकारी र जिल्ला जनस्वास्थ्य कार्यलय पर्सालाई  ध्यानाकर्षण गराएको स्मरण गराए  ।

उनले समुहले शिक्षाको गुणस्तरीयताकालागि बिद्यालयसंग सरोकारवालाहरुसंग छलफल कृषि र पशु प्राविधिकहरु किसानहरुसंग गुणस्तरीय बाली उत्पादन तथा पशुपालनका बिषयमा अन्तरक्रिया गर्ने गरेको बताए । उनले सीमान्तकृत समुदायले राज्यले दिएको सेवाका बारेमा जानकारी नपाएको र समुहले त्यस बिषयमा जानकारी दिने गरेको समेत बताए ।

कार्यक्रममा जिल्ला जनस्वास्थ्य कार्यालय पर्साका जनस्वास्थ्य अधिकृत सचिदानन्द सिंह अनौपचारिक क्षेत्र सेवा केन्द्र ( इन्सेक)ले आर्थिक तथा सामाजिक सांस्कृतिक अधिकारको क्षेत्रमा प्रभावकारी काम गरेको भन्दै प्रशंसा गरेका थिए ।

जिल्ला समन्वय समिति पर्साका निमित्त स्थानीय बिकास अधिकारी धर्मराज थापाले  राज्यले दिएको सेवालाई प्रभावकारी कार्यान्वयनको लागि सहयोगी भूमिका निर्वाह गरेकोमा इन्सेक र मानव अधिकार निगरानी समूहलाई धन्यवाद दिए ।

जिल्ला समन्वय समिति पर्साका उपप्रमुख ठाकुर न्यौपानेले इन्सेकले नागरिकको अधिकारको प्रत्याभूती संरक्षण र परिपूरणको क्षेत्रमा खेलेको भूमिकाको प्रशंसा गरेका थिए । उनले पर्साको दुईवटा वडामा मात्र कार्यक्रम संचालन भएकोमा कार्यक्षेत्र बिस्तारकालागि आग्रह गरे ।

कार्यक्रममा जिल्ला कृषि बिकास कार्यालय पर्साका प्रमुख बीरेन्द्र सिन्हा,नेपाल बार एशोसिएशन पर्साका सचिव हरेराम सर्राफ,घरेलु तथा साना उधोग कार्यालयका प्रमुख  सुर्दशन आचार्य लगायतले मन्तब्य ब्यक्त गरेका थिए ।