बीरगंज २४ चैत ।
गाउँपालिकाको प्रथम गाउँ सभा सम्पन्न नभई  दोस्रो गाउँ सभा गरेको भन्दै कालिकामाई गाउँपालिकाका ७ जना गाउँ सभा सदस्यहरुले बिरोध गरेका छन ।

उनीहरुले बिरोध स्वरुप दोश्रो भनिएको गाउँसभा बहिष्कार गरेका छन ।   एक वडा अध्यक्ष सहित ४ गाउँ कार्यपालिका सदस्य एवं २ वडा सदस्यहरुले चैत २१ र २२ गते बहुमतले गरिएको गाउँ सभा आफुहरुले बहिष्कार गरेको जनाएका छन ।

शनीवार बीरगंजको होटेल सम्झनामा  पत्रकार सम्मेलनको आयोजना गरी ७ जना गाउँ सभा सदस्यहरुले कालिकामाई गाउँपालिकाको प्रथम गाउँ सभा विना दोस्रो गाउँ सभा भएको दाबी गरेका छन ।

 
पर्साको १४ स्थानिय तहको सब भन्दा अन्तिममा २ दिन अगाडी मात्र सम्पन्न कालिकामाई गाउँपालिकाको गाउँ सभाबाट पारित आ.व. २०७४÷०७५ को बजेट, निति तथा कार्यक्रम आजै  सार्बजनिक गरिदैछ  । 

 पत्रकार सम्मेलनमा गाउँ कार्यपालिका सदस्य रामानन्द ठाकुरले प्रथम गाउं सभामा सहभागि हुन पाउनु पर्ने सुचना आफूहरुले दोश्रो गाउँसभाको सूचना पाउदा चकित भएको बताए ।

यस बारे गाउँपालिका अध्यक्ष नथुनी प्रसाद कुशवाहा संग बुझनदा प्रथम गाउँ सभा भइसकेको उनले बताए पछि आफूहरु बिरोधमा उत्रिएको उनले बताए ।  

 प्रथम गाउँ सभा कहिले गरियो, कहां गरियो र के निर्णय गरियो आफूहरुलाई केही थाहा नभएको उनले बताए । कालीकामाई गाउँपालिकाको पहिलो गाउँसभाले  गाउँपालिकाको सेवा केन्द्र सार्ने निर्णय गरेको थाह पाएको उनको भनाई थियो । तर अबैधानिक तरिकाले गरिएको गाउँ सभा र निर्णय खारेज गरियोस हालको गाउँ सभालाई प्रथम गाउँ सभा भनियोस ठाकुरले भने हाम्रो माग यत्ति हो । 

स्थानिय तह संचालन एेन २०७४ को ४ को उप दफा ३ अनुसारको प्रक्रिया अपनाई कुनै बिशेष बैठक बोलाउनु पर्ने भएमा एनको दफा १९ को उपदफा ४ बमोजिम बैठक बस्ने मिति, समय, स्थान र बैठकको कार्यसूची सहितको सुचना ७ दिन अगावै गाउँ सभाका सबै सदस्यहरुलाई पठाउनु पर्ने बाध्यात्मक व्यवस्था रहेको छ ।

तर कालीकामाई गाउँपालिकामा यस्तो पक्रिया पुरा नगरिएको गोप्य रुपमा बहुमतको डण्डा चलाएर तथाकथित गाउँसभा गरिएकोमा आफूहरुको आपत्ती रहेको ठाकुरले बताए । 

गाउँपालिका नेतृत्वको यस्तो हर्कतबाट गाउँपालिकाका सबै निर्णय प्रक्रियामा सहभागि हुन पाउने आफूहरुको कानुनी अधिकार कुण्ठित भएको ठाकुरले बताए । अहिले भइरहेको गाउँसभालाई प्रथम गाउँ सभा मानिएमा आफूहरु सहभागी हुने समेत उनले बताए ।

वडा अध्यक्ष शिवनाथ राउत कुर्मीको अध्यक्षतामा भएको पत्रकार सम्मेलनमा  गाउँ सभा सदस्य रामेश्वर प्रसाद कलवार, जगदिश प्रसाद तेली, रामशिष प्रसाद यादव, शान्ति देबी पासवान र मिना देबी कुशवाहाको सहभागिता रहेको थियो ।

यता गाउँपालिकाका प्रवक्ता संजय पटेलले भने “सार्वजनीक खपत”कालागि बहिष्कारको कुरा गरिएको बताए । सबै बैठकमा उहाँहरुको सहभागिता रहेको दावी गर्दै पटेलले सेवा केन्द्र सार्ने गाउँसभाको निर्णय आफूहरुलाई थाहा छैन भन्ने कुरामा दम नरहेको प्रष्ट पारे ।