वीरगन्ज । सशस्त्र प्रहरी बल पर्साले ठूलो मात्रामा प्रतिबन्धित लागुऔषध बरामद गरेको छ।
सशस्त्र प्रहरी बलको विशेष टोलीले वीरगन्ज महानगरपालिका–१६ स्थित इनर्वा क्षेत्रको पोखरीको डिलबाट बेवारिसे अवस्थामा फेला परेको प्लास्टिकको बोराभित्र रहेको ११ हजार ६८ पिस नाइट्राभेट ट्याब्लेट बरामद गरेको हो।
सशस्त्र प्रहरी बल सीमा सुरक्षा वीरगन्जबाट खटिएको टोलीले शंकास्पद अवस्थामा रहेको बोरा जाँच गर्दा ७ सय ३८ पत्तामा राखिएका नाइट्राभेट ट्याब्लेट फेला परेको सशस्त्र प्रहरी बल नेपाल नम्बर–१३ गण पर्साका प्रवक्ता सशस्त्र प्रहरी नायब उपरीक्षक विश्वराज योञ्जनले जानकारी दिए ।
बरामद गरिएको लागुऔषध भारतबाट तस्करी गरी नेपाल भित्र्याउने क्रममा सुरक्षाकर्मीलाई देखेपछि तस्करहरूले फालेर फरार भएको हुनसक्ने सशस्त्र प्रहरीको अनुमान छ।
बरामद नाइट्राभेट ट्याब्लेट आवश्यक कारबाहीका लागि प्रहरी चौकी इनर्वामा बुझाइएको प्रवक्ता योञ्जनले बताए।
तपाईको प्रतिक्रिया