वीरगञ्ज नाकाबाट तयारी कपडाको निर्यात ५० प्रतिशतले घट्यो

1/22/2017 गते 00 00 मा प्रकाशित 1393 पटक पढिएको

वीरगञ्ज, ९ माघ ः कपडा उद्योगहरु विस्तारै बन्द हुने क्रम बढेसँगै वीरगञ्ज नाकाबाट तयारी कपडाको निर्यात ५० प्रतिशतले घटेको छ । चालु आर्थिक वर्षको ६ महिनामा यहाँको नाकाबाट १२ करोड ९ लाख ४४ हजार मूल्य बराबरको २ लाख ७७ हजार थान तयारी कपडा निर्यात भएको छ ।

अघिल्लो आर्थिक वर्ष २०७२÷७३ को सो अवधिमा मधेस आन्दोलनको कारण वीरगञ्ज नाका ठप्प हुँदा कपडा आयात समेत ठप्प रहेको थियो भने आर्थिक बर्ष २०७१÷७२ मा २३ करोड २ लाख ६२ हजार मूल्य बराबरको ५ लाख २१ हजार थान कपडा निकासी भएको वीरगञ्ज भंसार कार्यालयको तथ्याङ्कले देखाएको छ । कच्चा पदार्थको आयातमा उच्च राजश्व वृद्धि, विद्युत कटौती तथा बन्द हड्तालका कारण कपडा उद्योगको उत्पादन घट्दै गएकोले निकासीमा असर परेको उद्योगी व्यवसायीले बताएका छन् ।

देशभरी ठूला, साना गरी करिब चार सय कपडा उद्योग रहेकोमा हाल सरकारी अदुर्दर्शिताका कारण १० प्रत्तिशत उधोग मात्र सञ्चालनमा रहेको वीरगञ्जका कपडा उद्योगीहरु बताउँछन् । सरकारको अव्यवहारिक औद्योगिक नितीले बारा पर्सा औद्योगिक करिडोरमा अन्नपूर्णा टेक्सटाईल्स, तिरुपति, हिमगिरी, गणेश, अशोक, स्टार, साह, गणपति लगायतका १ दर्जन कपडा उद्योगहरु बन्द हुँदा राज्यले अर्बौको क्षति व्यहोर्नु परेको छ भने हजारौ बेरोजगार हुन पुगेका छन् ।