सवारी ब्यवस्थापन शुल्कका नाममा ठेकेदार पक्षद्वारा गैरकानूनी रुपमा रकम असुली

7/28/2020 गते 00 00 मा प्रकाशित 1669 पटक पढिएको

बीरगंज महानगरपालिका भित्र चालु आर्थिक वर्षकालागि सवारी ब्यवस्थापन सेवा शुल्क उठाउने ठेक्का पाएको ठेकेदार कम्पनीले गैरकानुनी रुमा रकम असुल गरेको पाइएको छ ।

ठेकेदार कम्पनी श्री आर्यन कन्सट्रक्सनले ठेक्का बन्दोबसतीको बोलपत्रमा उल्लेख भएको शर्त र कार्यविधि बिपरित गएर रकम असुली गरिरहेको छ ।

बोलपत्रको कार्यविधिको बूदा नं १७ मा प्रष्ट रुपमा बीरगंज महानगरपालिकाले निर्माण गरेका सडकहरुमा चल्ने सवारी साधनहरुबाट मात्र सवारी ब्यवस्थापन शुल्क संकलन गर्न पाइने छ भनेर उल्लेख छ । शर्त र कार्यविधिमा नभएको स्थानमा गएर ठेकेदार कम्पनीले जोरजुलुम गरेर कानूनको धज्जी उडाउदै करका नाममा रकम असुल गरिरहेको छ ।

बीरगंजको तिलावे पुल भन्दा अगाडि बिन्दवासीनी, आइसीपी अलौ चोक, बाइपासको पिप्रा लगायतका दर्जन भन्दा बढी स्थानमा ग्याङ परिचालन गरेर ठेकेदार कम्पनीले रकम असुल गरिरहेको छ ।

बीरगंज महानगरपालिकाले चलन पूर्जी दिदा बिभिन्न किसीमका सवारी साधनको सवारी ब्यवस्थापन शुल्क तोकेको छ । बिशेष गरि भारतबाट आउने भारतीय सवारी साधनमा ठेकेदार कम्पनीले महानगरले तोकेको रकम भारतीय मुद्रामै लिने गरेको छ ।

१० चक्के भारतीय नम्बर प्लेट भएको ट्रकलाई महानगरले ३ सय रुपैया उठाउने इजाजत दिएको भएपनि ठेकेदार कम्पनीले २ सय ५० भारतीय मुद्रा लिने गरेको छ । ठेकेदार कम्पनीले दिने रसीदमा पनि २ सय ५० नै लेखेर दिने गरिएको छ । नगरपालिकाले तोकेको रेट भन्दा यो १ सय रुपैयाले बढी हो । रकम असुलीको यो काम पनि गैरकानूनी हो ।