काठमाडौं । राजस्व अनुसन्धान विभागले ललितपुरको इमाडोलबाट करिब ५० करोड रुपैयाँबराबरको अवैध इलेक्ट्रिक सिगरेट ९भेप० बरामद गरेको छ ।

 विशेष सूचनाका आधारमा इमाडोलमा रहेको गोदाममा उक्त भेप बरामद गरेको विभागका महानिर्देशक चण्डीप्रसाद घिमिरेले बताए । उक्त भेप सिल्क ट्रान्सपोर्टका संचालक रमेश शेर्पा र शंकास्पद भारतीय नागरिक पवनकुमार साहको रहेको स्रोतले बताएको छ ।

राजस्व अनुसन्धान विभागले छापामारी गरि बरामद गरेको  भेपको बजार मूल्य ५० करोड रुपैयाँसम्म रहेको अनुमान गरेको छ ।  स्रोतका अनुसार गोदाममा बरामद भेप रमेश शेर्पा र पवनकुमार साहकै हो ।

पवनकुमार साह र रमेश शेर्पाले विगत केही बर्षदेखि चीनबाट नेपालका तातोपानी रसुवा हुँदै भेप तस्करी गरी भारतमा बिक्री गर्दैआएका छन् ।

 तातोपानी र रसुवामा भन्सार विभाग र राजस्व अनुसन्धानले अनुगमन बढाएपछि उनीहरुले मुस्ताङको कोरलाबाट भेप तस्करी गर्दैआएको सूचना राजस्व अनुसन्धानले पाएपछि निगरानी बढाएको थियो । निगरानीकै क्रममा मंगलबार इमाडोलको गोदाममा छापा मारेको थियो ।

रौतहटको चन्द्रनिगाहपुरबाट नक्कली बाबु बनाई नागरिकता लिएका पवनकुमार साह र रमेश शेर्पाले लामो समयदेखि भेपको तस्करी गर्दैआएका थिए । प्रहरीदेखि भन्सार सबैतिर सेटिङ गरी उनीहरुले भेपको तस्करी गर्ने र भारतमा लाने गरेका थिए । तर यो पटक राजस्वले सूचना पाएपछि उनीहरुको गोदाममै छापा मार्न सफल भएको छ । 

को हुन् पवनकुमार साह ?

पवनकुमार साहले जिल्ला प्रशासन कार्यालय रौतहटबाट नक्कली बाबु बनाएर २०५२ साल मंसिर ७ गते नेपाली नागरिकता लिएको अभिलेखमा देखिन्छ । उनले चन्द्रनिगाहपुर स्थायी ठेगाना राखी लिएको नागरिकता प्रमाण पत्र नम्बर १७२९ रहेको छ । सो नागरिकता प्रयोग गरी उनले जिल्ला प्रशासन कार्यालय काठमाडौंबाट दोस्रो प्रतिलिपीसमेत निकालेको देखिन्छ ।

साहले नक्कली बाबु बनाएर नागरिकता लिएको खुल्ने प्रस्ट आधारहरु देखिने उनी निकट स्रोत दाबी गर्छ । ठूलो परिमाणमा तस्करीका सामान नेपाल हुँदै भारतमा पुर्याउने साहले बीरगंज, रसुवादेखि तातोपानी भन्सारसँग सेटिङ गर्दै आएका छन् । उनले श्रीमतीको नाममा रौतहटदेखि काठमाडौंसम्म अरबौंका जग्गा जमिन जोडेका छन् । 

को हुन् रमेश शेर्पा ?

तातोपानी नाका रहेको भोटेकोशी गाउँपालिका ५ का वडाध्यक्ष श्रेष्ठले तातोपानी भन्सारका तत्कालीन प्रमुख खत्री, सिन्धुपाल्चोकका तत्कालीन सीडीओ उमेश ढकाल र एसपी प्रज्वल महर्जनको अनदेखामा रमेश शेर्पाले सुन धडाधड ल्याउने काम गरेको आरोप पनि लगाएका थिए ।

५ बर्षअघिसम्म सामान्य झोलेपोके काम गर्ने साविक गाती गाविसका रमेश बाह्रविसे नगरका पूर्व मेयर निमफुन्जो शेर्पाका भान्जा हुन् । उनका बाबु सामान्य ह्यान्डीक्राफ्टको काम गर्थे । बैध, अवैध धन्दाकै कारण दिन दुई गुणा रात चौगुणाका दरले बृद्धि भएर रमेश अहिले अर्बपति भइसकेका छन् । सुन, भेपदेखि सबै खालका तस्करी रमेश शेर्पाले गर्दैआएका छन् ।