निरोगी नेपाल–स्वस्थ नेपालको दर्शन बिकास गरेका छौः प्रधानमन्त्री केपी ओली

इसीमाना सम्वाददाता २०८१ असोज ११ गते ०४: १० मा प्रकाशित 273 पटक पढिएको

काठमाडौं । प्रधानमन्त्री केपी शर्मा ओलीले मानव समुदायको रक्षाका लागि विश्वले मिलेर काम गर्नुपर्ने बताएका छन ।

संयुक्त राष्ट्रसंघीय मुख्यालय न्यूयोर्कमा आयोजित एन्टिमाइक्रोबियल प्रतिरोधसम्बन्धी उच्चस्तरीय बैठकमा बोल्दै ओलीले मानव र पृथ्वीको स्वास्थ्यको रक्षा विश्वको साझा दायित्व भएको बताए ।

‘मानिस र पृथ्वीको भविष्य रक्षा गर्न हामी मिलेर काम गरौँ, कसैलाई नछोडी’, ओलीले भने ।

अहिले एन्टिमाइक्रोबियल प्रतिरोध एक महत्त्वपूर्ण विश्वव्यापी सार्वजनिक स्वास्थ्य मुद्दाको रूपमा देखा ओलीले परेको बताए । नेपालको राष्ट्रिय स्वास्थ्य नीतिले पनि एन्टिबायोटिकको प्रयोगलाई प्रभावकारी रूपमा नियमन र नियन्त्रण गर्ने आवश्यकतालाई जोड दिँदै यसलाई प्रमुख जनस्वास्थ्य मुद्दाका रूपमा प्राथमिकता दिएको ओलीले जानकारी दिए ।

नेपालले एएमआरमा राष्ट्रिय कार्य योजना तयार गरेको र स्पष्ट दिशा प्रदान गर्न राष्ट्रिय एन्टिबायोटिक्स उपचार दिशानिर्देशहरू प्रस्तुत गरेको ओलीले बताउ ।

‘यद्यपि, एएमआरद्वारा उत्पन्न खतराहरूसँग लड्नका लागि राष्ट्रिय प्रयासहरू मात्रै अपर्याप्त छन्, तसर्थ, नेपालले बलियो सहयोगी विश्वव्यापी प्रतिक्रियाको लागि आह्वान गर्दछ’, ओलीले भने ।

यसकोलागि स्वास्थ्य पूर्वाधार, अनुसन्धान र विकासमा पर्याप्त लगानी गर्नुपर्ने उहाँको राय छ । साथै हामीले जैविक खेती जस्ता दिगो कृषि अभ्यासहरूलाई अगाडि बढाइ स्वास्थ्य जीवनशैलीलाई बढावा दिनुपर्ने उनले बताए ।

जसबाट खाद्य सुरक्षालाई सुरक्षित गर्नुका साथसाथै वातावरणको रक्षा गर्न सकिनेमा उनले जोड दिए ।

नेपाली जनताको समग्र स्वास्थ्य प्रवर्द्धन गर्न नेपालले निरोगी नेपाल–स्वस्थ नेपालको दर्शन विकास गरेको पनि उनले जानकारी दिए ।

‘हाम्रा प्रयासहरू एन्टिबायोटिकको प्रयोग कम गर्न र स्वस्थ, अधिक दिगो भविष्यलाई बढावा दिन निर्देशित छन्’, ओलीले भने ।